සරම්ප රෝගය වැලඳුනු එක් ආසාදිතයකුගෙන් උපරිම වශයෙන් තවත් පුද්ගලයින් දහසය දෙනකුට රෝගය බෝ විය හැකි බවට සෞඛ්‍ය අංශ අනතුරු අඟවයි.
ශ්‍රී ලංකා ළමා රෝග විශේෂඥයින්ගේ විද්‍යාතනයේ ජ්‍යෙෂ්ඨ විශේෂඥ වෛද්‍ය බී.ජේ.සී. පෙරේරා ප්‍රකාශ කරන්නේ කොවිඩ් වයිරසය ආසාදිතයකු හරහා තවත් පුද්ගලයින් සිවු දෙනකුට බෝවන අතර මෙම සරම්ප රෝගය වැලඳුණු එක් ආසාදිතයකු මගින් මිනිත්තුවක් තුළදී පමණත් තවත් පුද්ගලයින් නවදෙනකුට බෝවිය හැකි බවය.
ඒ අනුව මේ වන විට ව්‍යාප්ත වෙමින් පවතින මෙම සරම්ප රෝගය, ගෝලීය වසංගතයක්ව පැවැති කොවිඩ් වයිරසයට වඩා ඉතා දරුණු රෝගයක් බවද වෛද්‍යවරයා සඳහන් කරයි.
පසුගිය කොවිඩ් වසංගත සමයත් සමග දරුවන් වෙනුවෙන් කෙරෙන එන්නත්කරන වැඩසටහන් යම් කඩා වැටීම මෙසේ සරම්ප රෝගය යළි හිස එසවීමට ප්‍රධානතම හේතුව ලෙස වෛද්‍යවරයා පෙන්වා දෙයි.
ගෝලීය වශයෙන් ශීඝ්‍රයෙන් බෝ විය හැකි වයිරස් රෝග අතර මෙම සරම්ප රෝගයද ප්‍රධාන තැනක් ගන්නා බැවින් එන්නත් ලබාගෙන නොමැති දරුවන් වේ නම් ඔවුන් කඩිනමින් එන්නත්කරණය කරවා ගන්නා ලෙසද වෛද්‍යවරයා ජනතාවගෙන් ඉල්ලා සිටී.
1984 වසරේ සිට සරම්ප රෝගය සඳහා එන්නත් කරණය ආරම්භ කර එය මෙරටින් සහමුලින්ම තුරන් කළ බවට සහතිකයද ලෝක සෞඛ්‍ය සංවිධානය විසින් ලබා දී තිබුණි.
එහෙත් නැවතත් පසුගිය මැයි මස සිට මෙම රෝගය මෙරට තුළ ව්‍යාප්තිය ආරම්භ වී තිබේ.
