සමගි ජනබලවේගයේ නායක විපක්ෂ නායක සජිත් ප්‍රේමදාස මහතා සහ ජාතික ජනබලවේගයේ නායක අනුර කුමාර දිසානායක මහතා අතර පැවැත්වීමට යෝජනා කර ඇති විවාදය සඳහා ජාතික ජනබලවේගය විසින් තීරණය කර ඇති දින ඇතුළත් ලිපිය ලැබුණු බව සමගි ජනබලවේග පාර්ලිමේන්තු මන්ත්‍රී නලීන් බණ්ඩාර මහතා පවසනවා.
මන්ත්‍රීවරයා පවසන්නේ තීන්දු කර ඇති දින හතර ජාතික ජනබලවේගය ඒකපාර්ශවිකව තීරණය කර ඇති බවයි.
කෙසේ වෙතත් එම දින කිහිපය තුළ විපක්ෂ නායක සජිත් ප්‍රේමදාස මහතා යොදාගත් වෙනත් රාජකාරී කටයුතු ඇති බව ද මන්ත්‍රීවරයා පැවසුවා.
ඒ, අනුව එළෙඹෙන 25 හෝ 26 වනදා ජාතික ජනබලවේයේ නලින්ද ජයතිස්ස මහතා පාර්ලිමේන්තුවේ දී හමු වී දෙපාර්ශ්වයම එකඟවන දිනයක් මෙම විවාදය සඳහා යොදාගැනීමට කටයුතු කරන බව මන්ත්‍රී නලීන් මන්ත්‍රීවරයා වැඩිදුරටත් සඳහන් කළා.
නායකයින්ගේ වාදය සහ ආර්ථික කමිටුවේ විවාදය යන දෙකම සිදුකිරීමට එකඟතාවය පළවිය යුතු බව ද මන්ත්‍රීවරයා සඳහන් කර සිටියා.
ලබන මැයි මස 07,09,13 සහ 14 යන දිනවලින් ඕනෑම දිනයක් තුළ සමගිජන බලවේගයේ නායක සජිත් ප්‍රේමදාස මහතා සහ ජාතික ජන බලවේග නායක අනුර කුමාර දිසානයක මහතා අතර විවාදය පැවැත්වීමට සූදානම් බවට ජාතික ජන බලවේග ඊයේ (22) ලිපියක් මඟින් දැනුම් දුන්නා.
