මිනුවන්ගොඩ සෞඛ්‍ය වෛද්‍ය නිලදාරී කොට්ඨාසයේ ගම් 15ක මී උණ රෝගය වැළඳීමේ අධි අවධානම් ස්ථාන 65ක් නම් කිරීමට සෞඛ්‍ය වෛධ්‍ය නිලධාරී කාර්යාලය මගින් පියවර ගෙන තිබෙනවා.
මේ වන විටත් එම හඳුනාගත් ප්‍රදේශ තුළ මී උණ රෝගයෙන් ආරක්ෂා වීම පිළිබඳ උපදෙස් සහිත දැන්වීම් පුවරු සවි කිරීම සහ මහජනතාව දැනුවත් කිරීමේ වැඩසටහන් ආරම්භ කර ඇතැයි ද එම කාර්යාලය පවසනවා.
මෙම අධි අවධානම් ප්‍රදේශ තුළින් ඉකුත් වසරේදී මී උණ රෝගීන් විශාල ලෙස වාර්තා වූ බවත් මෙම වසරේ පළමු මාස 04ක කාලය තුලදී පමණක් මී උණ රෝග වැළඳුනු බවට හඳුනාගත් රෝගීන් 17 දෙනෙකු සහ මරණ 02ක් වාර්තා වී ඇතැයිද එම කාර්යාලය පවසනවා.
මෙම මියගිය දෙදෙනාගෙන් එක් අයෙකු යාගොඩමුල්ල සිට හීනටියන දක්වා පුරන් කුඹුරු යායක් මැදින් පයින් ගමන් කළ අයෙකු බවත් අනෙක් පුද්ගලයා අස්ගිරි වල්පොල ප්‍රදේශයේ අත්තනගලු ඔයේ අතු ශාඛාවක් දෙපස දර කැඩීමට ගිය අයෙකු බවත් එම කාර්යාලය පවසනවා.
