උතුරු මැද පළාත් හිටපු ප්‍රධාන අමාත්‍ය එස්.එම්. රංජිත් මහතා සහ ඔහුගේ පෞද්ගලික ලේකම්වරිය ලෙස කටයුතු කළ ඔහුගේ නෑනා වන ශාන්ති චන්ද්‍රසේන මහත්මියට කොළඹ මහාධිකරණය විසින් බරපතළ වැඩ සහිත වසර 16ක් බැගින් සිර දඬුවම් නියම කර තිබේ. මෙම තීන්දුව කොළඹ මහාධිකරණ විනිසුරු ආදිත්‍ය පටබැඳිගේ මහතා විසින් අද (02) පෙරවරුවේ ප්‍රකාශයට පත් කරන ලදී.
අල්ලස් හා දූෂණ විමර්ශන කොමිෂන් සභාව විසින් ගොනු කරන ලද චෝදනා පත්‍රයට අනුව, උතුරු මැද පළාතේ ප්‍රධාන අමාත්‍යවරයා ලෙස කටයුතු කළ කාලයේදී නීතියට පටහැනි ලෙස ඉන්ධන දීමනා වශයෙන් රුපියල් 2,080,500ක මුදලක් ලබා ගැනීම හරහා දූෂණයට සම්බන්ධ වූ බවට දෙදෙනාම වරදකරුවන් බවට පත් කර ඇත.
අධිකරණය මගින් සිර දඬුවමට අමතරව විත්තිකරුවන් දෙදෙනාට රුපියල් ලක්ෂ දෙක (රු. 200,000) බැගින් වූ දඩ මුදලක් ද නියම කර ඇති අතර, එම දඩ මුදල් නොගෙවන්නේ නම් තවත් වසර දෙකක බරපතළ සිර දඬුවම් භුක්ති විඳීමට සිදුවන බව අධිකරණය විසින් දැනුම් දී තිබේ.
English
Sinhala
Tamil